ХИС нь анх 1979 онд орос хэлний багш, орчуулагч бэлтгэх зориулалттайгаар байгуулагдсан.

Одоо ХИС нь  хүмүүнлэгийн ба нийгмийн ухаан, байгаль хамгаалал экологийн ухаан ба мэдээлэл харилцааны технологийн чиглэлээр 60 шахам мэргэжлээр бакалавр, магистр, докторын зэрэгтэй мэргэжилтэй боловсон хүчин, эрдэмтэн бэлтгэж байна.

ХИС-ийн түүх бол нийгмийн хөгжил, зах зээлийн эрэлт хэрэгцээг даган өөрчлөгдөн өргөжиж байгаа Монголын дээд боловсролын түүхийн нэг салшгүй хэсэг.

ХИС нь Монголын тэргүүлэх их сургуулиудын нэг бөгөөд Ази Номхон далайн орнуудын дээд боловсролын чанарын сүлжээний гишүүн.

ХИС нь өндөр хөгжилтэй орнуудын их, дээд сургуулиудтай хамтран ажиллаж сургалтын стандарт, төлөвлөгөөг жигдрүүлэн олон улсын түвшинд мэргэжилтэн бэлтгэх зорилтыг хэрэгжүүлж байна. Энэ бол ХИС-ийн дипломыг гадаадад хүлээн зөвшөөрөх нөхцлийг бүрэлдүүлж байгаа хэрэг болно.

Бид өөрийн сургуулийн хүрээнд болон гадаадын их, дээд сургуулиудтай хамтран хос мэргэжлээр боловсон хүчин бэлтгэж хөдөлмөрийн зах зээл дээр төгсөгчдийн хөрвөх чадварыг хангаж байна.

ХИС нь өөрийн оронд хүмүүнлэгийн болон нийгмийн шинжлэх ухааны нэг төв болон хөгжиж байна.

Бид хүмүүнлэгийн ба нийгмийн ухаан, тухайлбал хэл шинжлэл, сэтгэл судлал, соёл судлал, социологи, эдийн засгийн судалгааг шинжлэх ухаан хоорондын зааг дээр шинэлэг чиглэлээр өргөжүүлж байна. Үүний зэрэгцээ экологи, мэдээллийн шинжлэх ухааны чиглэлээр судалгаа хийдэг.

Эдгээр чиглэлээр манай эрдэмтэн багш нарын туурвисан бүтээл өөрийн оронд болон гадаадад шинжлэх ухааны эргэлтэд орсон билээ.

Манай эрдэмтэд хэлний бодлого, боловсрол судлал, экологийн болон мэдээлэл харилцааны чиглэлээр Засгийн газрын захиалгаар болон олон улсын төслүүд хэрэгжүүлж үр дүнг нь хэрэглээнд оруулж байна.

ХИС нь мэргэжлийн өндөр чадвартай, шинэлэг сэтгэлгээтэй эрдэмтэн багш нараар бүрэлдэхүүнээ бэхжүүлэн чанарын өөрчлөлт гаргасан. Сургалтын материаллаг болон технологийн баазыг бэхжүүлэн сургалт, судалгааны ажлын орчинг сайжруулж байна.

ХИС-ийн хамт олон хүмүүнлэгийн ба нийгмийн ухаан, экологи болон мэдээлэл харилцааны салбарт Ази тивдээ нэр хүндтэй тэргүүлэх сургууль болох зорилт тавин ажиллаж байна.

Бид төрөлх сургуулийнхаа ирээдүйд итгэл төгс байна.

                                                                                          Б.Чулуундорж

                                                                                          Доктор /Sc.D/, Профессор